Problema sa mga Brgy sa Mandaue gihatagan og solusyon

CEBU, Philippines —  Gihatagan og kasulbaran ni Mandaue City Mayor Jonas Cortes ang mga problema nga giatubang sa mga purok ug sitio sa kabarangayan sa Siyudad sa Mandaue human sa gihimo niyang pakisusi.

Lakip sa mga problema nga iyang nasuta mao ang drainage sa Purok 3 Santan Barangay Guizo ug nahukman sa mayor nga patas-an ang flooring sa drainage aron malikayan ang pagbaha sa maong dapit.  Gisunod usab pagsusi ni Mayor Cortes ang kahimtang sa Unit 3 Telecom sa Barangay Casuntingan ug iyang gimando ang paglimpyo ug pagpabalik sa poso sa tubig nga gikinahanglan kaayo sa mga molopyo sa ilang tinubdan sa patubig uban usab ang pagpalambo sa drainage system.

Sa Purok Banda Zone 4 sa Barangay Canduman nakita usab ni Mayor Cortes ang gubaon nga dalan ug iyang gimandu ang pagpa-aspalto sa karsada sa maong lugar.

Lakip sa nasuta nga problema mao ang nagpundo nga tubig baha sa purok pasayan Barangay Jagobiao.

Gumikan niini si Mayor Cortes nimando ngadto sa mga personnel sa City Engineering Office nga makig-alayon sa usa ka developer nga maoy giingong usa sa hinungdan sa mga pagbaha panahon sa ting uwan.

Gisugyot niya nga himoon ang pagsabot-sabot ug pagtinabangay pagsulbad sa problema sa kakulian sa kanal sa pipila ka lugar nga makamugna og pagbaha.

Gimanduan usab ni Mayor Cortes ang tanang mga purok leaders sa mga nabisita nga purok aron makig-alayon sila sa Department of General Services aron mahatag ang mga gikinahanglan nga materyales.— MEL (BANATNEWS)