Drone patrol pangusgan sa PRO-7

CEBU, Philippines — Bisan pa og mikunhod ang crime incidents sa Central Visayas sa pagsugod sa tuig 2013 apan ang Police Regional Office(PRO)-7 padayon nga mihimo og mga lakang aron mapakgang ang mga kriminilidad.

Usa sa gihimo sa PRO-7 mao nga migamit sila og teknolohiya diin matod ni Police Lt. Col. Gerard Ace Pelare ang tigpamaba ni PRO-7 Director Brigadier General Jerry Bearis nga usa kini sa mga programa sa direktor sukad sa paglingkod niini sa katungdanan.

Ang kapulisan sa Central Visayas mihimo og drone patrolling diin gigamit nila kini sa milabay nga Sinulog 2023 nga miresulta sa pagkadakop sa mga notadong mangunguot adtong higayona.

Apan giklaro ni Pelare ilaha kining i-institutionalize nga regular kining gamiton ug dili lang kun dunay mga kalihukan.

Gipasabot ni Pelare nga ‘daily patrolling’ ang pagahimoon sa 40 ka drone patrollers, makita kada adlaw nga dunay mga police personnel mag-drone, tugbang kini sa urban patrollers nga mosulod sa mga dapit ilabi na sa mga crime prone areas.

Ang 40 drone patrollers gitagsaan og drone diin ubos sila sa Regional Operations Division sa PRO-7 diin sila maoy mag-control niini, mag-plano asa dapit ang patrolling aron systematic ug analytical ang deployment.

Sa pagkakaron limitado pa ang units nga dunay drone patrol sanglit wala man kini malakip sa ilang pundo apan giawhag sa PRO-7 ang nagkalain-laing units nga makig-alayon sa Local Government Units aron matabangan sila sa pagpalit og drone nga magamit anti-criminality operations. (BANATNEWS)