LLCPO mopasiugda og shooting competition

CEBU, Philippines — Gikatakdang ipahigayon karong Pebrero 9 hangtud 12, 2023 ang City Directors Cup diha sa Wonderland Firing Range sa Barangay Maribago, Dakbayan sa Lapu-Lapu.

Si Police Colonel Elmer Lim, director sa Lapu-Lapu City Police Office (LLCPO) nagkanayon nga ang maong indigay apilan sa kapolisan ug mga sibilyan.

Si Lim nagkanayon nga gilaomang mosalmot sa maong competition ang kapolisan sa Bohol ug Siquijor.

Ang maong kalihokan gisuportahan sa Police Advisory Council pinaagi ni Pastor Robert Pepino nga maoy chairman niini.

Matud ni Lim nga lahi ang kategoriya sa mga sibilyan nga mosalmot ug lahi usab ang kategoriya alang sa kapolisan.

Giingong tumong sa maong shooting competition ang pagtigom og pundo nga ilang gamiton sa kaugmaran sa dugang pa nila nga mga buhatan sa LLCPO headquarters ug pagbaton usab og dugang pa nga kahimanan. (/BDB) (BANAT NEWS)