Gullas nagpasalamat sa kadaugan sa Talisay City contingent

CEBU, Philippines — Mapasalamaton si Talisay City Mayor Samsam Gullas sa mga nisalmot ug sa tanang nitabang alang sa kalamposan sa ilang contingent sa Sinulog sa Carmen niadtong adlaw nga Domingo diin sila nihakot ug daghang awards.

Wa kapugni sa mayor ang iyang kalipay sa kadaugan nga ilang na-angkon ug iya kining gipadayag sa iyang facebook page.

Lakip sa iyang gipasalamatan ang mga Tourism personnel nga gipanguluhan ni Mikki Aznar ug ni Marvey Caño gumikan sa ilang koordinasyon. 

“I would also like to say DAGHANG SALAMAT to all our dancers, propsmen and teachers who volunteered for their time and effort just to ensure the success of our presentation”. Tipik sa FB post sa mayor.

Gipasalamatan usab niya ang Talisay National Highschool, Talisay Central Elementary School, Cansojong National High School ingon man ang Talisay City College. Nakadayeg ang mayor sa tanang nitabang sa ilang kalamposan sama sa mga opisyal sa siyudad, mga department heads ug sa mga gikinanan ug mga tinun-an nga nihatag sa ilang sakripisyo.  

Atol sa Ritual Showdown sa Sinulog Based Category nigawas nga 1st runner up ang Talisay City Contingent.

Nalangkat usab sa Talisay City Contingent ang Best in Musicality, Best in Street Dancing ug Best in Festival Costume.

Nakadaug usab sa pagka festival queen ang gikan sa Dakbayan sa Talisay nga mao si Kiara Liane Wellington.

Si Wellington nidaug na usab pagka festival queen atol sa gipahigayon nga Sinulog sa Dakbayan sa Sugbo. (BANATNEWS)