SITG nipadala na sa mga ebidensiya ngadto sa RACU-7
CEBU, Philippines — Gipadala na sa Special Investigation Task Group (SITG) sa Cebu City Police Office (CCPO) ngadto sa Regional Anti-Cybercrime Unit (RACU)-7 ang mga ebidensiya nga ilang nakuha.
Ang SITG maoy nagtutok sa imbestigasyon sa kaso sa duha ka human rights advocates nga giingong gidagit niadtong Enero 10, 2023.
Kini ang gibutyag ni Police Lieutenant Colonel Albert Quilotorio, nangulo sa SITG.
Ang mga ebidensiya nga nakuha sa SITG mao ang plate number sa sakyanan ingon man ang Close Circuit Television (CCTV) footages diha sa Pier 6 diin nahitabo ang insidente.
Gikataho nga ipa-enhance sa SITG ang plate number nga nakuha aron masuta ang tag-iya sa sakyanan.
“As of now gi-gather pa namo tanang unsay ebidensiya namo, istoryahan namo sa SITG kong unsay lig-on nga ebidensiya para ma-file nato ang kaso”, padayag ni Quilotorio.
Matud ni Quilotorio nga ang mga ebidensiya nga ilang nakuha makatabang kini og dako sa pagsulbad sa kaso.
Hangtud karon nagpaabot ang kapolisan nga moduol kanila ang mga biktima nga sila si Dyan Gumanao ug Armand Dayoha aron matandi ang ilahang mga pamahayag sa mga ebidensiya nga ilang nakuha ug makapasaka na sila og kaso batok sa mga giingong nidagit kanila.
“As long unsay makuha dayon sa area at the same time kining atong complainant makaari para ma-file dayon nato ang kaso”, matud ni Quilotorio.
Nasayran nga nakuhaan na usab sa kapolisan og affidavit ang pipila ka mga witnesses sama sa security guards nga diha sa dapit atol sa panghitabo. (BANATNEWS)
- Latest
