Civil works alang sa Cebu BRT gisugdan na
CEBU, Philippines — Nagsugod na ang civil works alang sa Cebu BRT project bisan wala pa mahuman ang pormal nga ground-breaking ceremony sa maong proyekto.
Ang ground-breaking himuon unta karong buwana apan giuswag kini sa sayong bahin sa buwan sa Pebrero niining tuiga.
Sa maong giplanohan nga adlaw giingong dili bakante ang scheduel ni Presidente Ferdinand “Bongbong” Marcos, Jr..
Sa laing tentative date nga gitakda si Cebu City Mayor Michael Rama na usab ang adunay laing schedule.
Nagpaabot nalang karon ang mayor nga ma-finalize ang schedule ni PBMM.
Matud sa project overseer ug manager South Road Properties Engineer Bo Varquez nga posibleng mahibaw-an sulod karong semanaha ang final date.
Giklaro ni Varquez nga bisan og gi-finalize pa ang schedule sa pormal nga ground-breaking ceremony nasugdan na ang civil works alang sa BRT.
“Actually, magsugod na ang demolition sa island kay part man na siya sa project to remove some of the islands sa Osmeña Boulevard”, padayag ni Varquez.
Gibutyag ni Varquez nga ang pipila sa mga Bougainvillea gipang-ibot na kini.
“If you notice, ang ubang mga tanom, Bougainvilleas gipang-remove na…So naa na gyuy lihok”, ni Varquez pa.
Sa wala pa matapos ang termino ni kanhi kalihim Art Tugade niadtong Hunyo sa niaging tuig,nag-earth ball na sa mga kahoy sa rota sa BRT.
“Ang formal nga ground-breaking na lang gyud ang gihuwat”, dugang ni Varquez. —Caecent Noot- Magsumbol (BANATNEWS)
- Latest
