Palma: hugot nga pagsalig sa Ginoo makahupay sa mga suliran

CEBU, Philippines — Gihimug-atan ni Cebu Archbishop Jose Palma sa iyang homily sa Pontifical Mass sa ika-458th nga selebrasyon sa kapistahan ni Senior Santo Nino nga dili molugak sa pagsalig sa kahitas-an.

Si Archbishop Palma mihulagway sa mga pagsulay nga nasinati sa Sugbo diin tungod sa lig-ong pagsalig sa mga Sugboanon sa labaw nga makagagahum dali lamang usab kaayo ang pagbangon niini.

Dugang pa ni Palma nga bisan ang kampanaryo sa Basilica Minore del Santo Nino nga naguba dihang nahitabo ang linog apan karon daw dili na makita ang mga timailhan sa nasinating kadaut niini.

Apil sa iyang gihisgutan mao ang pandemiya sa COVID-19 duha na ka tuig ang nakalabay ug hangtud karon nagpabilin kini nga hulga sa katawhan.

Gihinumdoman usab ni Palma ang pag-igo sa bagyong Odette sa Sugbo diin daghan sa mga simbahan ang nakasinati og kadaut ug kabalayan nga nangaguba. Apan bisan pa man niini padayon ang atong pagsalig kang Senior Santo Nino hinungdan nga dali lamang usab ang pagbangon sa Sugbo.

Bisan karong panahona ang tibuok kalibotan ang nakasinati og kalisod tungod sa gubat sa ubang kanasuran sama sa panaggubat sa Russia ug Ukraine nga bisan layo ra kita apan lakip gihapon sa naepektohan.

Nunot niini si Palma kusganon nga nag-awhag sa mga Sugboanon sa pagpalig-on pa sa pagtuo ngadto kang Senior Santo Nino kay kini ang dakong grasya nga gihatag sa atong Ginoong Dios. (BANAT NEWS)