Operator sa e-sabong namalhin na sa bukirang barangay

CEBU, Philippines — Gibutyag sa kapolisan sa Rehiyon Siete nga ang mga operator og illegal nga sugal sama sa e-sabong nibalhin na sa mga bukirang dapit.

Kini human gironda sa Regional Anti-Cybercrime Unit(RACU)-7, Regional Intelligence Division (RID7), Regional Mobile Force Battalion( RMFB7), Provincial Intelligence Units (PIU) San Fernando Police Station ang operasyon sa usa ka e-sabong sa Barangay Bugho, Lungsod sa San Fernando sa miaging adlaw.

Matud ni Police Regional Office-7 Director Brigadier General Jerru Bearis nga ang gironda nga lugar matod pa wala’y signal apan ang operator nakapadayon gihapon sa iyang kalihukan gamit ang teknolohiya sama sa internet.

“May nakuha silang satellite disk as per check on the RACU there is a satellite disk at numerous equipment for the IT”, matud ni PBGen Bearis.

Giklaro ni Bearis nga aron mapuhag ang padayong operasyon sa e-sabong nga usa ka illegal nga kalihukan kinahanglan nga makig-alayon sa mga hingtungdang ahensiya sa gobyerno sama sa National Telecommunications Commission aron mag usa ang ilang lakang.

Sukad sa paglingkod ni Brigadier General Bearis sa katungdanan subsob ang operasyon nila batok sa illegal gambling nga maoy rason nga ang mga ilegalista adto na sa bukid mohimo niini kay sa urban areas dali silang madakpan. (BANATNEWS)