Kadaugan sa Carcar niadtong 2020, nasubli

CEBU, Philippines —  Subling nalangkat sa  Carcar  City Division  sa One Cebu  Sinulog sa Kabataan kagahapong adlawa pagmatuod nga dili tsamba ang ilang kadaogan sa Sinulog sa Kabataan sa Lalawigan kaniadtong tuig 2020.

Ang grupo maoy nakaangkon sa unang puwesto sa Best in Ritual Showdown nga dunay ganti nga P500K. Naangkon usab nila ang award nga Best in Costume nga nagtangag sa ganti nga P50K.

Gawas sa Carcar, nakadaog sab sa ritual showdown ang Barangay Tejero ( 2nd/ P400k) , Tribu Cebu Tech (3rdP300K), Lumad Basakanon (4th P200K) Banay Labangon sa Brgy. Labangon (5th / P150k) .

Samtang nakaangkon og puwesto sa Best In Musicality ang Carcar City (1st), Lumad Basakanon  (2nd),Barangay Tejero (3rd), Tribu Cebu Tech (4th) ug Banay Labangon (5th).

Sa Best in Street Dancing ang nakadaog mao beterano ng grupo nga Lumad Basakanon (1st), Barangay Tejero (2nd) ug Carcar City Division (3rd).

Samtang ang hepe sa Cebu City Disaster Risk Reduction and Management Office (CCDRMMO)  Harold Alcontin nipadayag nga wala ray ‘untoward incidents’ nga nahitabo kay hapsay ang pagpadagan sa kalihokan inabagan usab sa kapolisan ug ubang niabag.

Moabot sa kapin sa 20 mil ka tawo ang nisaksi sa maong kompetisyon diha sa Cebu City Sports Complex.

Sa wala pa gihimo ang ritual showdown sa Cebu City Sports Center , nihimo una og street  dancing ang contingents nga nanukad sa Plaza Independencia.

Suma pa ni Alcontin nga ubay-ubay ka medical stations ang gimontar nila kagahapon ug dunay duha ka kaso nga ilang giatiman human gibikogan ang mga tiil.

Todo pangandam  na usab karon ang CCDRMMO alang sa umaabot nga grand parade karong Enero 15, 2023.

Una na nga nigawas dinhi sa Banat News sa niaging adlaw nga magmuntar ang CCDRMMO og duha ka temporaryong “mini hospital “ , 21 ka medical stations ug 8  ka staging area (emergency stations) sa pipila ka area sa South Road Properties alang sa umaabot nga Sinulog Grand Parade .

Suma pa niya nga abagan usab sila sa pipila ka barangay, emergency responders , Department of Health , hospital administrators ug uban pa nga institusyon.

Dugang pa ni Alcontin , nga atol sa Sinulog , duna  22 ka ambulansya ang  naka-standby ug walo ka mga firetruck ang naka-standby sa maong kalihokan. (BANAT NEWS)