Nagpailang “quack doctor” midagit sa alahas sa negosyante

CEBU, Philippines —  Nasikop ang usa ka 49 anyos nga lalaki human siya nadagit sa alahas sa usa ka negosyante nga babaye didto sa sitio Riverside, Barangay Cansojong, Dakbayan sa Talisay niadtong miaging adlaw.

Ang nasikop mao si Joselito Maglangit Jarales, 49 anyos, ulitawo nga taga sitio Janssen Site, Barangay San Nicolas, siyudad sa Sugbo.

Samtang ang biktima mao si Jujilyn Ramirez, 32 anyos, tag-iya og sari-sari store nga taga barangay San Roque sa nahisgutang siyudad.

Segun sa imbestigasyon sa kapolisan nasuta nga nagpaila nga manghihilot ang suspek o “quack doktor” nga nipasalig nga maayo ang biktima sa iyang gipamati sa lawas.

Gipatangtang siya sa iyang ariyos ug kwentas nga gold ug gipasulod sa plastik bag dayon gibutang sa altar mga usa ka oras.

Apan sa nakamatikod ang biktima nga di mao ang iyang nabuhat dali niya nga gisusi iyang alahas pero nawagtang na kini ingon man ang suspetsado.

Misumbong ang biktima sa otoridad hangtud sa gihimo nga follow up operation ug nasikop gyud kini.

Si Police Lt. Col. Randy Caballes, hepe sa kapolisan sa Talisay nagkanayon nga notado na ang suspek sa iyang modus. Ang pagkasikop sa suspetsado nagsugod niadtong Enero 2019 didto sa Pantukan, Comval, Davao City; Marso tuig 2019 didto sa Tagunol, Basak, San Nicolas, siyudad sa Sugbo ug sa Marso 2021 didto sa Poblacion Central, lungsod sa Dumanjug.

Ang pinakauwahing pagkadakop sa suspek mao ang iyang paghimo sa iyang modus sa siyudad sa Talisay. Giangkon ni Caballes nga sa dihang siya pa ang hepe sa Mambaling Police Station ila na kining nadakpan ug karon nga siya ang hepe sa Talisay dinhi nasab nihimo sa modus ang suspek. (BANAT NEWS)