Ginang nga migamit sa 4-anyos diha sa cyberporn gikasohan

CEBU, Philippines — Usa ka ginang ang gipasakaan og kaso sa National Bureau of Investigation Central Visayas tungod sa matud pa pagabuso niini sa kaugalingong 4-anyos nga anak nga babaye nga iyang gigamit sa cyberpornography.

Matud pa sa NBI-7 ang maong inahan miabusar sa anak pinaagi sa pagkuha og hulagway ingon man video samtang iyaha kining giabuso ug ibaligya kini ngadto sa mga langyaw nga kliyente.

Ang bata anaa na karon sa kustodiya sa Department of Social Welfare and Development human kini na rescue niadtong Nobyembre 30.

Wala hinuon dakpa sa NBI-7 ang suspek kay wala nila kini maaktohing naghimo sa krimen ug wala sab silay nakuhang video o uban pang ebidensiya gikan mismo kaniya bahin sa giingong law-ay nga gipanghimo niini sa anak tungod kay gipang-delete na kini.

Apan bisan pa niini, ang NBI-7 ni apply ug warrant to seize, search and examine data sa cellphone sa maong inahan.

Samtang nagpaabot ang NBI sa resulta niini, niduso na sila og kasong Human Trafficking and Child Abuse nga kaso batok sa maong inahan niadtong Disyembre 2, 2022, duha ka adlaw human nila giluwas ang bata.

Gibase nila ang kaso sa nakuhang impormasyon gikan mismo sa Norwegian police human duna silay nadakpan didto sa ilang nasud niadtong Hunyo 28 nga nakuhaan nila og mga video ug hulagway sa maong bata nga giabuso sa inahan.

Sumala pa ang pagpangabuso sa maong bata nahitabo sugod niadtong bulan  Hunyo hangtud Nobiyembre ning tuiga base kini sa surveillance nga gihimo sa NBI sukad nga gipahibalo sa mga otoridad sa Norway.

Nasuta nga ang gidakop nga Norwegian didto sa Norway dunay contact sa suspek nga inahan sa batang giabuso. (BANATNEWS)