Konsehales ug mga bise mayor hatagan og pinaskohan sa Kapitolyo

CEBU, Philippines — Ang Probinsiya sa Sugbo mohatag og P200, 000 ngadto sa mga konsehal sa lungsod ug siyudad sa Probinsiya sa Sugbo ug tag P1 milyon ngadto sa mga bise mayor nga nitambong sa general assembly Philippine Councilor’s League Provincial Federation niadtong Disyembre 1, 2022.

Si Gobernador Gwendolyn Garcia kinsa nitambong sa kalihokan maoy nianunsiyo sa maong sayong pinaskohan sa Kapitolyo ngadto sa mga konsehal.

Nagpasalamat usab si Garcia sa pagsuporta sa mga konsehal sa iyang administrasyon.

Giawhag ni Garcia ang mga konsehal nga i-consolidate o tipunon ang ilang tagsa- tagsa nga madawat nga pundo aron nga mapatuman og mahinongdanon nga proyekto sa imprastraktura nga molungtad og dugay.

“If only, with this appropriation for our councilors and vice mayors, we can prove that together as one, united we can do so much more for Cebu and the Cebuanos”, matud ni Garcia.

Ang general assembly gitambongan kini sa nagkadaiyang konsehal sa mga lungsod ug siyudad sa probinsiya gipangulohan sa konsehal sa Dakbayan sa Toledo nga maoy Presidente karon sa maong organisasyon ug ex-officio board member Ricardo “Kuya Nick” Pepito.

Anaa usab sa maong kalihokan sila ni Tourism Secretary Christina Garcia Frasco, Deputy Speaker Duke Frasko ug Kongresista Pablo John “PJ” Garcia sa 3rd district uban sa mga bokal ug mga mayor sa probinsiya. (/BDB) (BANAT NEWS)