92-day challenge sa PRO-7 gidawat

CEBU, Philippines — Gidawat sa mga Provincial Directors ug City Director sa kapulisan sa Rehiyon Siete ang 92-day challenge ni Police Regional Office (PRO)-7 Director Brigadier General Roderick Augustus Alba. Gihagit ni Alba iyahang mga tawo nga dili magmika ug pangusgan pa ang ilahang kapanya batok sa tanang klase kriminilidad.

Ang tanang police directors ug mga Chiefs of Police ipaubos og evaluation sa buwan sa Enero sunod tuig aron pagsusi kun angayan pa ba silang ipabalin sa ilang katungdanan o hulipan na.

Ang Provincial Director sa Siquijor Provincial Police Office, Negros Oriental Police Provincial Office, Cebu Police Provincial Office ingon man ang mga City Directors sa Cebu City Police Office, Mandaue City Police Office ug ubang hepe sa nagkalain-laing police stations ang midawat sa hagit ni Alba.

Si Police Col. Ireneo Dalogdog, City Director sa Cebu City Police Office miingon nga kaya buhatan sa CCPO ang hagit sa heneral.

Samtang si Police Col. Robert Lingbawan, Provincial Director sa Siquijor Provincial Police Office miingon nga mosuporta siya niini.

Ang Negros Oriental Police Provincial Office sa ilang bahin ubos sa pagdumala ni Police Col. Jonathan Pineda midawat sab sa hagit. Si Police Col. Rommel Ochave, Provincial Director sa Cebu Police Provincial Office miingon nga ang tanang stations commanders mag ‘think outside the box’ ug mag palambuon pa ang ilang units, systems ug processes.  Human unya sa 92 ka adlaw ang maong mga police officials mopresentar sa ilahang State of the Peace and Order Address diin naa ang presenisya sa tagsa-tagsa nila ka Local Chief Executives aron i-report ang ilahang mga accomplishments. (BANATNEWS)