Construction workers nga CCMC 4th Phase project nawad-ag trabaho

CEBU, Philippines — Dili mominos 300 kapin ka mga construction workers nga maoy nagtrabaho sa bag-ong Cebu City Medical Center ang naminghoy sa dihang wala na sila ka trabaho human gi terminate na ni Mayor Michael Rama ang kontraktor nga nagtrabaho sa 4th phase sa maong tambalanan.

Ang maong mga trabahante wala masayod nga wala na diay silay trabaho nga maabtan atol sa ilang pagtambong adlaw nga Huwebes. Wala na sila pasudla sa construction site tungod sa kamanduan sa kanselasyon sa maong kontrata.

Matud pa sa pipila ka mga trabahante nakuratan sila tungod kay orada-orada ang desisyon ug wala sila kapangandam.

Si Ryan Adlawan, usa sa mga trabahante nitug-an nga pait gayud kaayo sila karon kung hingpit gayud sila mawagtangan og trabaho kay unsa naman lang unya ang ilang ibuhi sa ilang pamilya kinsa naglaum ngadto sa ilang mga panimalay nga aduna silay trabaho adlaw nga Huwebes.

Dugang pa ni Adlawan, wala sila mapahibalo daan ug giingnan lang sila nga papaulion, kadtong magulian pa og probinsya anha lang usa sa ilang barracks samtang nagpaabot kung unsay desisyon sa ilang mga kadagkuan.

Nasubo sab sila karon kay hapit na ang Pasko unya mawagtangan na hinoon sila’g trabaho.  Ang mga trabahante nag-ampo nga ikonsiderar sa kagamhanan ang ilang desisyon. Nga unta makatrabaho gihapon sila aron aduna silay ibuhi sa ilang banay. Si Rama nipahibalo niadtong adlaw nga Miyerkules, Nobiyembre 9, 2022 nga kanselahon sa siyudad ang kontrata tali sa kontraktor nga motrabaho sa 4th  phase kay langay kaayo unya kinahanglan na kini sa katawhan. —/IBM (BANAT NEWS)