Mga estraktura sa bay walk sa Talisay gipangguba

CEBU, Philippines — Giguba sa anti-vending task force sa Dakbayan sa Talisay ang estraktura diha sa bay walk sa Barangay Dumlog, Dakbayan sa Talisay.

Si Edwin Nierves, pangulo sa task force nagkanayon nga kaniadtong ambulant lang kini nga dali ra nga makahipos sa lugar.

Apan nabantayan nga permamente nga estraktura na ang gihimo hinungdan nga ila kining gipahimangnoan nga gub-on tungod kay gidili kini sa balaod.

Matud ni Nierves nga kadaghan na sila nakadawat og reklamo sa mga tawo nga mag-again diha sa lugar.

Ang mga manindahay diha sa nahisgutang lugar gihatagan og higayon nga makabaligya apan magsugod kini sa alas 4:00 sa hapon hangtud sa alas 10:00 sa gabii tungod kay daghang tawo ang mosuroy diha sa dapit.

Apan ang pagbutang og estraktura nga permamente ang gidili.

Matud ni Nierves nga padayon ang ilang paglibot diha sa kabarangayan aron sa paghawan sa mga estraktura diha sa mga side walk.

Sa laing bahin, si Mayor Cesar “Didoy” Suan nibutyag nga 15 porsyento na lang sa fixed ug floating cottages sa Lungsod sa Cordova ang wala pa hingpit nga nangaguba.

Ang Local Government Unit na ang nangbungkag niini dihang napupos na ang tagal nga gihatag ni Gobernador Gwendolyn Garcia ngadto sa mga tag-iya sa nahisgutang cottages.

Matud pa ni Suan nga nagpadayon ang ilang pagpanangtang sa tanang floating ug fixed cottages. —/BDB (BANAT NEWS)