Magtiayong nagmotor gipangtigbas

CEBU, Philippines — Nagligdas na sa karsada ang patay'ng lawas sa magtiayon nga biktima sa pagpanigbas  tapad sa natumba nilang motorsiklo diha sa Purok 1 sa Barangay Dapdap sa Lungsod sa Compostela alas 7:30 ang takba sa miaging gabii.

Si Police Abdrew Rellanos,; hepe sa  Compostela Police Station miila sa mga biktima nga sila si Cecilio Camanse Depositario; 40, ug asawa niini nga si Axel Dano Depositario, 39, mga molupyo sa Barangay Licos sa Siyudad sa Danao. Sumala pa sa kapolisan, ang mga residente sa lugar nakadungog og kusog nga lagapak. Ang mga molupyo dali nga nanggawas aron pagsusi kun unsa kadtong kasikas.

Gikatahong duna silay nakitang duha ka mga wala mailhing lalaki nga nagdali-dali og biya sakay og motorsiklo.

Si Llanos miingon nga sa pagsusi sa mga patay’ng lawas, ang bana adunay samad tinigbasan sa iyang tangkugo samtang samad usab sa liog ang naangkon sa asawa nga maoy hinungdan sa ilang hinanaling kamatayon.

Wala pay dugang nga impormasyong gihatag ang kapolisan kun unsay motibo sa pagpatay sa duha ug kun si kinsa ang mga mamumuno. Gisusi pa karon sa kapolisan ang backgrounds sa magtiayon. (BANATNEWS)