GMRC ug English gitinguhang ipabalik sa Provincial School Board

CEBU, Philippines — Gusto nga ibalik sa Provincial School Board ang Good Manners and Right Conduct (GMRC) ug English nga subjects sa pagtudlo sa mga tinun-an sa Probinsiya sa Sugbo.

Ang school board niumol kini og technical working group aron mahan-ay ang pagpatuman sa pagtudlo sa English isip medium of instruction ngadto sa mga tinun-an gikan sa kindergarten ngadto sa Grade 12.

Si Bokal Raymund Calderon maoy mangulo sa maong TWG diin langkuban kini sa mga sakop sa DepEd-7, provincial ug city division niini uban sa League of Municipalities of the Philippines (LMP-Cebu) ug pribadong sektor.

Kini nasabotan atol sa tigom tali kang Gobernador Gwendolyn Garcia uban sa miyembro sa school board niadtong Oktubre 21, 2022.

“Gikan sa kinder ngadto sa grade 3 mother tongue gikan sa grade 4 ngadto sa grade 6 tagalog, grade 7 to grade 12 anha pa mosulod ang English. Naglibog na’g maayo nang estudyante gisigehan ra’g ekspirimento ning atong mga bata”, matud ni Garcia sa taho sa Provincial Information Office.

Gusto usab sa school board nga matudloan og maayong pamatasan ang mga bata pinaagi sa pagbalik sa GMRC hilabina karon nga ang mga tinun-an aduna nay access sa social media diin mamahimong makakuha o makopya nila ang mga dili maayo nga pagtulon-an.

Nihimo sa maong lakang ang provincial school board human nasayran nga ang Pilipinas adunay educational crisis diin giingong 80 porsyento sa mga tinun-an ang  wala makakab-ot sa minimum level sa kahanas niini base sa ilang grade levels base sa usa ka pagtuon niadtong tuig 2019. — (/BDB) (BANAT NEWS)