Sugbo maoy bida sa Philippine  Tourism Industry Convergence

CEBU, Philippines — Nahimong bida ang Sugbo sa gipahigayon nga Philippine Tourism Industry Convergence Reception didto sa Pasay City niadtong Oktubre 17, 2022.

Nakita sa tourism stakeholders ang naglangkub sa turismo sa Probinsiya sa Sugbo hinungdan nga usa kini sa mga kanunay nga bisitahon sa mga turista hilabina sa mga langyaw.

Atol sa maong kalihokan nakita sa stakeholders ang  kultura sa Sugbo pinaagi sa pasundayag sa lima ka contingents sa Pasigarbo sa Sugbo 2022 nga gilangkuban sa Hinulawan Festival sa Dakbayan sa Toledo, Palawod Festival sa Lungsod sa Bantayan, Dagitab Festival sa Dakbayan sa Naga, Kabkaban Festival sa Dakbayan sa Carcar ug Rosquillos Festival sa Lungsod sa Liloan.

Gawas niini, gipakita ang AVP (audio-video presentation) kalabot sa pamaagi sa pag-promote sa Sugbo sa nagkadaiayng tourism destinations niini. Ang Suroy-Suroy Sugbo nga flagship sa tourism program sa probinsiya mapatuman na karon lukop nasud human nilusad ang Department of Tourism og nationwide version niini nga gitawag nga  “Philippine Experience: Culture, Heritage, and Arts Caravan“ atol sa reception dinner.

Ubos sa maong programa ang DOT maoy magdala sa mga grupo sa mga turista ngadto sa nagkadaiyang tourism destinations sa nasud hilabina kadtong mga dili pa kaayo ilado.

“Our goal is to equalize opportunities across the regions and support the preservation of our country’s cultural heritage and artistic resources”, tipik sa pamahayag ni Tourism Secretary Christina Garcia - Frasco. Si Gobernador Gwendolyn Garcia kinsa nitambong sa maong kalihokan nagkanayon nga usa ka mapasigarbohong gabii alang sa Sugbo ang nahitabo didto sa Pasay City.

Nitambong usab sa maong kalihokan sila si Presidente “Bongbong” Marcos, Jr., Bise Presidente Sara Duterte,  First Lady Liza Araneta Marcos ug Kongresista Sandro uban sa nagkadaiyang opisyal sa gobiyerno, miyembro sa diplomatic community ug tourism stakeholders.

Atol sa maong kalihokan gibutyag ni Frasco nga base sa Oktubre 16, 2022 nga datos nikabat ngadto sa 1, 767, 791 ang international arrivals sa Pilipinas diin nilapas kini sa 1.7 million nga target sa DOT sa pagsugod pa sa tuig 2022.