Mga empleyado sa city hall makadawat og Christmas bonus

CEBU, Philippines — Sayo nga gipahibawo ni Mayor Michael Rama kagahapon nga adunay madawat nga   Christmas bonus karong tuiga ang mga empleyado sa city hall.

Tumong ni Rama nga moabot sa P17,000 ngadto sa P20,000 ang madawat nga bonus sa matag empleyado karong buwan sa Disyembre.

Apan matud ni Rama nga ang final nga hukom depende kini sa Sangguniang Panglungsod nga maoy moaproba.

Apan naglaom si Rama nga mahatagan kini og pagtagad sa konseho ubos sa liderato ni Bise Mayor Raymond Garcia.

Nasayran nga sa naandan nga pamaagi kaniadto, ang Program on Awards and Incentives for Service Excellence (PRAISE) maoy mo-rekomendar ngadto sa konseho    nga pahatagan og cash incentives ang mga empleyado sa city hall.

Sayo pa, si Rama nagkanayon nga dili siya magduha-duha sa pagpahatag og bonus sa mga empleyado isip pag-ila sa mga natampo niini sa pag-alagad ngadto sa katawhan.

Kataposang nakadawat og bonus ang mga empleyado sa city hall kay niadtong buwan sa Pebrero karong tuiga atol sa selebrasyon sa Charter Day. BDB (BANATNEWS)