Drug dens sa Cebu City ug Bohol gironda

CEBU, Philippines — Pito ka mga tawo ang nasikop atol sa pagbungkag sa mga tinugyanan sa Philippine Drug Enforcement Agency Central Visayas sa duha ka mga drug dens sa Dakbayan sa Sugbu ug sa Panglao Bohol niadtong adlaw nga Huwebes.

Unang operation nahitabo sa may Sitio Tiangihan, Barangay Sambag 1 ning Dakbayan sa Sugbo nga gikasikop sa upat ka mga tawo.

Ang nasikop mao ang giingong tigmentinar sa drug den nga si Alex Lanuza, alyas Dodong Ongo, 49 , on call massage therapist ug mga parokyano niini nga sila si Jojopith Rosialda, 27, habal-habal driver, Rigel Nacua, 46,call center agent ug Annaliza Abastas, 46, walay trabaho.

Nasakmit gikan kanila ang dili mominos sa 11 gramos nga gituohang shabu nga mobalor og dul-an sa P75 mil, buy bust money ug kagamitan sa pagamit sa ginadili nga drugas.

Samtang tulo ang nasikop sa Purok 7, Barangay Tawala, Panglao sa Bohol nga giilang sila si Herminiano Salan Jr., 20, nga giingong drug den maintainer.

Gisikop sab ang iyang mga parokyano nga mao sila si John David Ysalena,32, ug Mark Goudin,36, parehong mga habal-habal drivers.

Dul-an sa P75 mil nga ginadili nga drugas, buy bust money, kagamitan sa pagsuyop ug P250 nga gituohang halin sadrugas ang nasakmit gikan kanila. Ang mga dinakpan nagtingkagol na karon sa lock-up jail ug gipaabot ang pagpasang-at ug tukma nga kaso nga kalapasan sa Sections 5, 6, 7, 11, 12, and 15, Article II of RA 9165 .— IBM (BANATNEWS)