DMDP gipasidunggan nonot sa ilang livelihood program

CEBU, Philippines — Gipasidunggan sa Konseho sa siyudad sa Sugbo ang Department of Manpower Development and Placement (DMDP) gumikan sa malampuson nga pilot barangay program niini sa Barangay San Nicolas Proper.

Si Konsehal Jose Lorenzo Abellanosa nipasiugda og resolusyon kalabot sa maong butang nga giaprobahan sa konseho.

Matud pa ni Abellanosa nga anam anam nga miubos ang unemployment rate sa nasud nga unang misaka gumikan sa COVID-19 pandemic.

Gitataw sa konsehal nga adunay mga tawo nga wala’y puy-anan  ug  wala pud makasinati sa  bisan unsang pag-uswag sa pinansyal sukad sa pandemya tungod sa kakuwang sa oportunidad sa pagpanarbaho.

Ang DMDP usa ka buhatan sa kagamhanan sa dakbayan nga naghatag og mas maayong kahigayonan sa mga residente pinaagi sa nagkadaiyang skills training.

Kahinumdoman giawhag kaniadto sa konseho ang kagamhanan sa dakbayan sa paghatag og tabang ngadto Barangay  Council sa San Nicolas Proper pinaagi sa DMDP sa pagpahigayon og skills training, edukasyon ug pagpalig-on sa ekonomiya sa Pilot Livelihood Program niini ngadto sa mga walay panimalay nga pamilya ug indibidwal nga gipapuyo ug giatiman  sa maong barangay.

Giingong ubay-ubay gyud ang mga natabangan sa maong programa. —MEL  (BANATNEWS)