Ordinansahon giduso alang sa pagmugna sa “TMC board”
CEBU, Philippines — Si Cebu City Councilor James Anthony Cuenco niduso og ordinansahon nga nag-amendar sa City Ordinance No. 1264 nga gikan sa naandan nga Cebu City Traffic Management Coordination Committee, pagahimoon na kini isip Cebu City Traffic Management Coordination Board o “TMC Board”.
Kini nagtumong sa pagpahiuyon sa nangaging kabag-ohan, pagpalapad sa mga miyembro niini, ug pagpalig-on sa inter-agency nga koordinasyon ug gimbuhaton.
Giduso na kini sa Committee on Laws, Ordinances, and Styling alang sa dugang pagtuon.
Kaniadto gitawag kini og Cebu City Traffic Operations Management (CITOM) Board.
Nalatid sa seksyon 1 ang pagmugna sa TMC Board ubos sa buhatan sa mayor ug kini maoy magsilbing policy making body sa Cebu City Transportation Office.
Ang board gilangkuban sa 26 ka miyembro, lakip ang chairman ug vice-chairman, nga itudlo sa City Mayor gikan sa mga miyembro niini.
Sa 26 ka miyembro, 10 ka tawo ang pilion sa mayor gikan sa publiko ug pribadong sektor ug 16 ka ex-officio members.
Lakip sa gimbuhaton sa TMC Board mao ang pag-aprobar sa mga polisiya, plano, ug mga programa sa CCTO; pagtimbang-timbang sa pagplano ug pagpatuman sa mga gikinanghalan sa pagdumala sa trapiko. —MEL (BANATNEWS)
- Latest
