Cebu City mopahigayon og coastal cleanup

CEBU, Philippines — Ubay-ubay ka sektor lakip na ang pipila ka mga nasudnong ahensiya sa gobiyerno ang nipadayag sa ilang pagsuporta sa umaabot nga coastal cleanup sa Dakbayan sa Sugbo karong Septiyembre 17, 2022.

Nasayran nga si kanhi environment secretary Roy Cimatu nanawagan sa mga nasudnong ahensiya  nga tabangan ang Siyudad sa Sugbo sa paghatag og kasulbaran sa problema niini sa baha ug basura.

Base sa taho sa Cebu City Public Information Office gibutyag  sa usa sa mga legal assistant ni Mayor Michael Rama Atty. Jerone Castillo nga tipik kini sa ilang mga lakang alang sa programa nila nga “Gubat sa Baha”.

Sa niaging semana gitudlo ni Rama si Cimatu isip “DENR-like secretary” sa Dakbayan sa Sugbo ug mangulo sa Gubat sa Baha Task Force.

Adunay tigom ang maong grupo sa niaging adlaw nga gitambongan sa mga representante sa  City Government, Department of Environment and Natural Resources, Department of Public Works and Highways (DPWH), Cebu Contractors Association (CCA), Cebu Chamber of Commerce and Industry, ug uban pa.

Atol sa maong tigom gitudlo si Atty. Gerardo Carillo isip overall ground commander sa cleanup activity karong Septiyembre 17, 2022.

Abagan siya ni Reymarr Hijara, mayor’s special assistant alang sa environment concerns.

Nisaad ang DPWH-7 ug DPWH-Cebu City District Office nga mag- deploy og amphibious floating excavator, backhoes, loading machines ug dump trucks alang sa maong kalihokan.

Motabang usab ang Philippine Coast Guard, Philippine National Police, Armed Forces of the Philippines ug uban pa nga non-government organizations. BDB (BANATNEWS)