Subling gilusad kagahapon ang dancing inmates sa CPDRC
CEBU, Philippines — Human sa pipila ka tuig nga wala makapasundayag ngadto sa publiko nibalik na karon ang Cebu Provincial Detention and Rehabilitation Center (CPDRC) dancing inmates sa pagpakita sa ilang talento sa pagsayaw.
Kagahapon, 186 ka inmates sa CPDRC ang niapil sa sayaw gamit ang lainlain nga music atol sa re-launching sa dancing inmates.
Ang sayaw gitudlo sa Cebuano dance sport choreographer nga si Edward Hayco.
Gisaksihan ni Gobernador Gwendolyn Garcia uban ni Bise Gobernador Hilario Davide III, mga bokal, mayor ug ubang opisyales ang maong kalihokan diha sa CPDRC grounds.
“Karong buntaga (gahapon) inyong gipasidunggan ang atong pagkaSugboanon”, matud ni Garcia.
Si Garcia nagkanayon nga tanang Sugboanon apil na ang mga inmate ang angayan hatagan og oportunidad hinungdan nga adunay mga programa nga gipatuman alang sa mga inmate.
Apil na niini ang paghatag og scholarship grant gikan sa TESDA alang sa mga persons deprived of liberty (PDL) aron makat-on og ubang skills sama sa baking ug paghilot.
Gihatagan usab ang unang batch sa PDLs sa CPDRC og passbook human nagpa-enroll sa Cooperative Bank of Cebu. — (/BDB) (BANAT NEWS)
- Latest
