Managpuyo nga nagmotor gipamusil, usa ang patay

CEBU, Philippines — Patay ang usa ka 45-anyos nga lalaki human kini gipusil sa wala mailhing lalaking nagsakyanan samtang ang biktima ug kapuyo nagsakay og motor diha sa may Hernan Cortes Street, Barangay Subangdako, Mandaue City niadtong Lunes sa gabii.

Ang biktima naila nga si Roberto Estandarte, kasamtangan nagpuyo sa may Barangay Subangdako. Samtang wala ra maunsa ang kapuyo niini nga si Junelyn Valleramos.

Ang suspetsado gikatahong nagsakay og sedan nga sakyanan nga walay plaka.

Sa inisyal nga imbestigasyon nga gipahigayon nila ni PSSgt. Frederick Andales, Investigator on Case, padulong na sa ilang balay ang duha sa dihang pag-abot sa maong lugar gisikitan sila og sakyanan ug kalit namusil ang sakay niini.

Human sa pagpamusil ang suspetsado dali usab nakasibat sa wala matino nga direksyon.

Ang biktima nakaangkon ug samad pinusilan sa dughan gamit ang wala matino nga armas.

Dali kini nga gidala sa tambalanan apan gideklarar kini nga dead on arrival sa tambalanan.

Ang kapulisan padayon pa karon nihimo ug imbestigasyon may kalabutan sa maong insidente.

Sutaon pa usab sa kapulisan lakip ang background sa biktima ug gisubay ang tanang mga CCTV footages nga makatumbok kun kang kinsa ang maong sakyanan. —IBM (BANATNEWS)