Mga basura sa Guadalupe River salaon

CEBU, Philippines — Butangan og “bio-fences “ ang pipila ka mga bahin sa Guadalupe River aron masala ang mga basura ug dili molapos paingon sa kabaybayonan.

 Makigtagbo ang Department of Public Services (DPS) sa mga opisyales sa nagkadaiyang barangay  kun  diin  nag-agi ang Guadalupe River aron hisgotan ang maong butang ilabi na ang pagsulbad sa problema sa basura nga nasinati sa pipila ka mga dapit.

Sa report sa Public Information Office (PIO) sa dakbayan , nakigtigom Mayor Michael Rama pinaagi sa Zoom sa pipila ka mga opisyales  ug usa sa natuki  mao ang mga basura nga naglutaw sa mga coastal areas nga makita gikan sa South Road Properties (SRP) viaduct.

Gitambungan kini sa mga barangay kapitan gikan sa Pasil, Ermita, Suba, ug Sawang Calero kansang mga baybayon gihabolan karon og mga basura gikan sa maong suba.

Sa maong tigom, ang mga opisyal sa coastal barangays mireklamo nga sa mga residente gikan sa ibabaw nga mga barangay nagagaikan ang kadaghanan sa mga basurang modagsa sa ilang baybayon.

“Ang mga basura dira, gikan man sa babaw. Bisan manglimpyo mi sa ubos, apan kung sa babaw aduna gihapoy hugaw modung sa ubos, useless ang atong trabaho,” suma pa ni  Ermita Barangay Captain Mark Miral.

Samtang si Atty. John Jigo Dacua, pangulo sa DPS, niingon nga motakda siya og tigom sa tanang barangay kun asa nag-agi ang Guadalupe River aron tukion ang posibleng solusyon sa maong concern.

Ang Cebu Contractors Association (CCA), nga nitambong sa tigom, nisaad nga moabag sa dakbayan pinaagi sa pag-abag og heavy equipment ug sa pagbutang sa bio-fences.

Si Engr. Justin Go sa CCA miingon nga makatabang sila sa pagdesinyo sa bio-fences o pukot nga mopugong sa solid waste nga nanglutaw sa sapa.

Si Go miuyon sa rekomendasyon nga magbutang sab og bio-fences sa kabaybayonan ug sa ibabaw nga bahin sa sapa. Dugang pa niya nga importante ang pagmentinar niini.

Samtang ang hepe sa Cebu City Environmental Sanitation Enforcement Team (CESET) nga ai Grace Luardo nihangyo sa mga opisyal sa barangay nga higpit nga ipatuman ang mga balaod sa solid waste ug dakpon ang mga tawo nga molabay sa ilang basura sa sapa.

Si Luardo niingon nga ang CESET mahimong mo-deputize sa mga barangay tanod ug ubang personnel aron legal nga makadakop sa mga malapason ug makaisyu og citation ticket ngadto kanila. —/IBM (BANAT NEWS)