OBO mohimo og kinalit nga pagsusi sa mga edipisyo

CEBU, Philippines — Dunay surpresang inspeksyon nga himoon ang Office of Building Official (OBO) sa dakbayan sa Sugbo sa gipangtukod nga building dinhi sa siyudad.

Kini aron pagsuta kun nituman ba sa mga safety measures ang mga operators sa gipang-construct nga building. Suma pa sa hepe sa OBO nga si Architect Florante Catalan nga tumong sa ilang subsob nga inspeksyon mao ang pagpaneguro nga luwas ang mga gitukod nga building bisan og naa kini mga permit.

Samtang ang laing opisiyal sa OBO partikular na sa complaints section nga si Engr. Joshua Ng niawhag usab sa katawhan nga kinahanglan nga pilion ang saktong tawo nga maoy modumala sa konstruksyon ug dili kadtong mga tawong makonsiderar nga "kilid-kilid" aron dili mapahamak ang estruktura.

Sa pagka-karon, ang OBO dunay gi-endorse didto sa City Legal Office nga 100 ka mga estruktura nga giingong nahimutang sa dili haom nga lugar o duol sa mga sapa.

Gipaabot nalang nila ang mahimong resulta sa pakisusi sa maong buhatan.

Bisitahon usab sa OBO ang giingong mga pribadong building nga wala magamit gumikan kay walay permit aron maseguro nga wala kini sekretong gigamit.

Samtang mopahigayon og pag inspeksyon ang mga sakop sa engineering department sa Dakbayan sa Talisay sa kalig-on sa mga establisamento sa siyudad.

Si City Engineer Arnel Bacalso nibutyag nga nakadawat sila og memorandum sa secretary sa Department of Public Works and Highways (DPWH) labot niini.

Una niini si mayor Gerald Anthony “Samsam” Gullas nimando na nga susihon ang kalig-on sa mga edipisyo human sa nasinate nga linog didto sa Abra. —Gabriel C. Bonjoc/MEL (BANATNEWS)