Overpricing sa pagkaon sa Panglao gipaimbestigar

CEBU, Philippines — Gimando ni Bohol Gov. Erico Aristotle C. Aumentado ang paghimo og imbestigasyon ug miawhag sa mga lokal nga mga kagamhanan sa probinsya paghimo og mga lakang batok sa sa gikatahong pagpahimulos sa pipila ka magpapatigayon ngadto sa mga lokal nga turistang miduaw sa Panglao.

“Ingon ani na diay kamahal ang pagkaon sa Virgin Island, Bohol? “matud pa sa post sa usa ka Vilma Uy bahin sa nabayran nga pagkaon sa usa lang ka kaonan samtang diha sila sa maong lugar.

Gipakita diha sa post ang listahan sa ilang gikaon sama sa kinilaw, lato, scallops, katambak nga isda, ug uban pa nga sa tan-aw sab sa mga netizens sobra ra kaayo gipaburot ang presyo.

Apan duna say laing netizen nga ni-post nga ang gipakita lang nga mga hulagway sa pagkaon sa nagreklamo, mga salin nalang.  Gipakita niya ang lista kun pila ka orders ang gikaon sa grupo. Apan sa kataposang bahin sa iyang post miingon nga “kun wala moy kwarta ayaw mo og suroy og Panglao.”

Ang gobernador pagkasayod sa maong post mipadayag sa iyang kadismaya ilabi na nag-viral kini sa social media.

“Atong gi mando-an ang SP na ipa imbistegar  ang mga panghitabo. Ug pasalamat kita sa Social Media kay naka hatag ni og lig-on nga rason aron maka craft na ang Sangunian Panlalawigan og mga resolutions or ordinances nga maka hatag og protection sa mga turista nga sa dugayng panahon gipahimoslan sa pipila ka negosyante sa Panglao,” matud pa sa post sa gobernador.

“Atong hatagan og insaktong serbisyo ug angayan panggaon nato ang mga turista isip atong bisita kay sila ang gahatag og panginabuhian nato. Ug magpatawag ta og emergency meeting, ang Provincial Government, DENR ug LGU Panglao uban sa Tourism Sector nga maoy apektado sa mga panghitabo. Ug apil ko nga na dismaya sa panghitabo isip amahan sa probinsya,” dugang pa sa iyang pamahayag.

Ang lokal nga turista nakurat sa kadako sa gipabayran kanila nga miabot og P26 mil. Nanuroy ang grupo diha sa Virgin Island, sa Panglao sa maong probinsya.

Tungod sab niini, ang direktor sa DENR-Central Visayas nga si Paquito Melicor Jr. mibutyag nga nakigalayon na karon ang Bohol Provincial Environment and Natural Resources Officer Ariel Rica sa Local Government Unit sa Panglao uban sa Protected Area Management Board ug Panglao Island Protected Seascape aron tukion ang maong panghitabo.

Sa memorandum nga gipirmahan August 2, 2022 PENRO Bohol gimanduan kini nga mohimo ug dinalian nga lawom nga imbestigasyon kabahin sa reklamo ug mohimo og rekomendasyon bahin niini.

Dugang pa ni Melicor, ang Virgin Island gipaubos sa PIPS subay sa RA 11038 o Expanded National Integrated Protected Area System Law.

Nahimo kining kabahin sa gitawag nga eco-tourism sa probinsya aron tabangan ang lokalidad ug makahatag og trabaho sa mga residente sa lugar pinaagi sa turismo.— IBM (BANATNEWS)