Turismo sa kabarangayan sa Cebu City palambuon

CEBU, Philippines — Gusto sa Cebu City Tourism Commission (CTC) nga palapdan ang ilahang mga programa ug makig-alayon sa dugang mga stakeholders aron i-promote ang siyudad.

Positibo sab ang mga kadagkuan sa turismo sa siyudad sa maong plano subay sa pagkatudlo ni kanhi Liloan Mayor Christina Frasco isip Secretary sa Department of Tourism.

Si Konsehal Joy Pesquera, Chairperson sa Cebu City Tourism Commission miingon nga si Mayor Michael Raman mimando nga ilambigit ang mga nagkalain-laing barangay sa ilahang tourism promotion programs.

“We are also expanding our programs. Now, we are going to help barangays with big festivals. We will start with capability building nga ma-upgrade nila how they organize their events nga naay tourism value,” sigon ni Pesquera.

Ang maong mga festivals naglangkob sa Siomai Festival sa Barangay Tisa, Tuslob Buwa Festival sa Barangay Pasil ug Puso Festival sa Barangay Inayawan.

Sigon ni Pesquera ang maong mga festivals ilado na apan kinahanglan gihapon kini palambuon aron mahimong marketable sa turista.

Sa mga bukirang Barangay sa siyudad nga dunay natural spots, si Pesquera miingon nga nakig-alayon sila sa Department of Environment and Natural Resources (DENR) aron ang maong mga lokasyon masusi alang sa safety ug viability.

Ang CTC commissioners ingon man mga officers sa Cebu City Tourism Office(CCTO), ang implementing arm sa komisyon nagpahigayon og stragetic planning workshop.

Gituki sab sa commissioners ang mga hagit nga giatubang karon sa industriya ilabi na naa pa ang pandemya.  Moumol sab sila og City’s Tourism master plan alang sa 2022 ngadto sa 2025.

Si Neil Odchigue, ang bag-ong gitudlo nga CCTO Head maninguha nga makab-ot tinguha sa  siyudad nga Singapore-like Cebu City. —IBM (BANATNEWS)