“City Hall at your doorstep” gibalik na sa siyudad

CEBU, Philippines — Dako ang pasalamat ni Kapitan Dante Tabucal sa Barangay Sudlon 1 nga ang iyang barangay maoy unang giadto sa Cebu City Hall sa pagbalik na sa “City Hall at your doorstep” aron manghatag og libreng serbisyo sa katawhan.

Gihulagway ni Kapitan Tabucal nga dili lalim nga ang naa sa siyudad mosaka sa bukid ingon man ang naa sa bukid moadto sa siyudad hinungdan nga dakung tabang ang maong programa sa gobyerno.

“Hinaot nga ang kining programa nga gihatag sa atong Mayor nga ato gyud mapuslan ug atong mapalapdan ang serbisyo nga gikinahanglan sa mga tawo.” suma ni Kapitan Tabucal.  Si City Administrator Engr. Suzanne Ardosa miasoy nga ang ‘City Hall at your doorstep’ programa sukad pa ni Mayor Michael Rama diin ang mga serbisyo dad-on ngadto sa 80 ka barangay sa dakbayan.

Nahunong kini kaniadto ug karon ilahang gisugdan pagbalik ug himoon kini kada adlaw’ng Biyernes hangtud na sa buwan sa Nobiyembre.

Ang pangulo sa Barangay Affairs Office Ian Hassamal mipasabot nga giuna ang mga barangay nga naa sa layo.

Sunod Biyernes ang ‘City Hall at your doorstep’ adto na sab mohatag og libreng serbisyo sa katawhan sa barangay Lusaran.

Nagkalain-laing serbisyo ang napahimuslan sa katawhan sama sa dental ug medical services, pakapon sa iro ug uban pang serbisyo nga gitanyag sa Cebu City Government. (BANAT NEWS)