Mga proyekto sa barangay subling lihokon

CEBU, Philippines — Gitinguha sa Cebu City Resource Management and Development Center (CREMDEC) nga ma-finalize sa daling panahon  ang Barangay Development Plan (BDP), nga ila nang nasugdan alang sa 80 ka barangay sa dakbayan.

Sa taho sa Public Information Office (PIO) sa dakbayan, si Allan Bautista, CREMDEC administrative officer, niingon nga nalangan ang ilang mga aktibidad tungod sa mga kalamidad nga miigo sa dakbayan ug sa election ban nga gikan Marso 25 hangtod Mayo 8, 2022.

Dugang pa ni Bautista nga kun madayon ang barangay elections karong Disyembre, ilang masakop ang tanang 80 ka barangay alang sa ilang gitinguha nga BDP aron mahatagan og komprehensibo nga plano alang sa kalamboan sa matag barangay.

Ang BDP usa ka tulo ka tuig nga komprehensibo nga multi-sectoral development plan nga giumol pinaagi sa inclusive ug participatory approach nga gipangunahan sa development council niini ug giaprobahan sa Sanggunian niini.

Usa kini ka opisyal nga dokumento sa barangay nga naglatid sa mga opsyon sa polisiya, programa, proyekto ug aktibidad nga gituyo aron makatampo sa pagkab-ot sa kalamboan sa barangay.

Nagkanayon si  Bautista nga nagsugod na sila sa barangay Cogon Pardo, Ermita, Kalubihan, Kinasang-an, Pamutan, San Roque, Sambag I, Sudlon I, Tagbao, ug Tinago.

Matud niya magdepende ang ilang direksyon sa mando sa Department of the Interior and Local Government (DILG).

Nagplano usab ang CREMDEC nga palapdan ang dili mominos 47 ka mga dalan nga mahimo usab nga farm-to-market roads, nga nagkinahanglan og gibanabanang pundo nga P1.2 bilyones. Apil sa mga karsada nga agian niini gikan sa Barangay Kalunasan paingon sa Barangay Adlaon.

Si Bautista niingon nga aduna nay Deed of Sale ang pipila ka lote nga maapektuhan sa katukoran sa proyekto.

Duna pu'y water pipeline project nga nagkantidad og P1.5 milyones alang sa irigasyon sa umahan sa bukirang bahin sa dakbayan.

Aduna usay giplanohang dam sa Barangay Cambinocot, nga adunay budget nga P1.4 bilyones, aron mahatagan ug igong suplay sa tubig sa 31 ka barangay sa dakbayan.

Sa koordinasyon sa CREMDEC, ang Visayan Electric Company mopahigayon usab ug libreng linya sa kuryente sa bukirang bahin gikan sa Adlaon agi sa Guba hangtod sa Agsungot.

Matud ni Bautista nga makatabang gyud kini sa mga residente nga nagsalig karon sa solar lights. —IBM (BANATNEWS)