Ubang kandidato nigasto og dako bisan walay kaatbang

CEBU, Philippines — Niadtong Miyerkules, Hunyo 8, 2022 ang deadline sa pag-file og Statement of Contribution and Expenditures (SOCE) sa mga winning ug non-winning candidates sa nilabay’ng eleksiyon.

Sa Cebu City South District 24 ka nikandidato sa milabay’ng eleksiyon ang gilaoman nga moduso sa ilang SOCE apan sa record sa Comelec Cebu City 20 ra ang nakasumiter.

Ang mga nakasumiter sa South District mao sila si Pie Abella, Jose Abellanosa, Romonito Alcoseba, Gremar Barete, Roberto Cabarrubias, Crystal Gikom, James Anthony Cuenco, Alan Dinampo, Harry Eran, Francis Esparis, Rey Gealon, Dondon Hontiveros, Jack Jaca, Omar Kintanar, Bea Osmeña, Junjun Osmeña, Samuel Romulo Panilagao, Joy Pesquera, Simeon Romarate, Phillip Zafra, Eduardo Rama Jr. ug BG  Rodrigo Abellanosa.

Samtang ang duha nga wala nakasumiter mao sila si Alejandro Cabido ug Janet Calleno tungod kay matud ni Comelec Cebu City election officer Marilou Paredes hand written ang SOCE nga ilang gisumier ug walay seal.

Sa north district, sa 36 nga nikandidato 33 ra ang ang naka-file niadtong Hunyo 8.

Kini gilangkuban nila ni Gian Andre Aznar, Mary Ann de Los Santos, David Tumulak, Rachel Marguerite del Mar, Melvin Legaspi, Reynald Lauron, Richard Yap, Pastor Alcover Jr., Joel Garganera, Noel Eleuterio Wenceslao, Alvin Dizon, Franklyn Ong, Jerry Guardo, Alvin Arcilla, Michael Rama, Winston Pepito, Sisinio Andales, Edgardo “Jaypee” Labella II, Peter Mancao, Lea Japson, Nestor Archival, Joy Augustus  Young, Edwin Jagmoc, Emmanuel Labella, Margarita Osmeña, Maria Buanghug, Raymond Alvin Garcia, Arturo Barrit, Crisologo Saavedra Jr., Roland Empleo, Francisco Fernandez, Edgar Concha Jr., ug Niña Mabatid.

Nunot niini, sa Siyudad sa Mandaue 30 ka nikandidato ang nakasumitir sa ilang SOCE ug nasuta nga si Mayor Jonas Cortes kinsa subling nagpapili sa posisyon nakagasto kini og P692,093, Bise Mayor Glenn Berced running mate ni Cortes nakagasto og  P107.66.

Ang kaatbang nga kandidato nga si Atty. Olin Seno nakagasto og P300,000 ug P80,594 usab ang tandem niini nga si kanhi PBA player Elmer Cabahug.

Subay niini, bisan og walay kontra sa nilabay’ng eleksiyon pipila ka mga kongresista sa Probinsiya sa Sugbo ang dako-dako gihapon og gasto atol sa campaign period.

Apil niini si Kongresista Pablo John Garcia sa 3rd district nga nakagasto og P683, 186. 74 base kini sa iyang SOCE.

Ang nidaog nga kongresista sa unang distrito Rhea Gullas nakagasto usab og P743, 875. 64.

Si Kongresista Peter John Calderon nakagasto og P62, 526.41 ug wala kini kaatbang sa 7th district. —Romeo T. Limpangog, Le Phyllis F. Antojado/BDB (BANATNEWS)