Cebu ikatulo ra sa pagpamakuna batok COVID-19  

CEBU, Philippines — Malipayon nga gipahibawo ni Dr. Jaime Bernadas, Regional Director sa Department of Health Central Visayas nga niabot na sa 70 percent ang nabakunahan kontra COVID-19 sa tibuok Central Visayas.

Apan gihimug-atan ni Bernadas nga bisan  pa niini dili sila mohunong pagpadayon pag-awhag sa mga wala pa gyud nagpabakuna o wala nagpa -booster shot nga buhaton kini.

Si Dr. Van Phillip Baton, Program Manager sa Emerging and Re-emerging Infection Diseases sa DOH Central Visayas miingon sa upat ka Probinsiya sa Sugbo ang Siquijor maoy daghan og nabakunahan nga niabot og 91.52 percent, sunod ang Bohol 71.55 percent, Cebu 64.44 percent ug Negros Oriental 57.50

Sa upat ka probinsya sa rehiyon, ang Sugbo ug lalawigan sa Negros Oriental ang ilang tutukan sa pagpamakuna.

Sagad sa nagdumili pagpabakuna mao ang mga senior citizens ug duna say uban miingon nga dili nila kinahanglan ang bakuna kay dili sila manggawas.

Sumala pang Baton, mogawas man o dili duna gihapon silay posibilidad nga ma-expose sa Covid-19 tungod kay duna silay mga kabanay nga magsige og gawas sa balay nga posibleng maoy magdala niini.

Giawhag sa DOH ang mga LGUs nga bisitahon pagbalik ang ilahang data aron masuta kun asa na sila dapita sa ilahang target.

Gipaubos sa Alert Level 1 sa Bohol sa 48 ka LGUs sa Bohol 15 niini ang gipaubos na sa Alert level 1; Cebu Province apil na ang tulo ka highly urbanized Cities sa 50 ka LGU napulo niini ang alert level 1; sa Negros Oriental unom sa 25 ka LGUs ang alert level 1 ug sa Siquijor ang tanang municipalities nila ang gipaubos na sa alert level 1. (BANAT NEWS)