Mga record sa CAO gipaubos na sa digital

CEBU, Philippines — Gipauswag sa Cebu City Assessor’s Office (CAO) ang mga serbisyo sa ilang buhatan ug gipaubos sa digital ang ilang records aron mapatulin ang pagproseso sa mga mokuha og tax declaration.

Matud ni Leizl Calamba, assistant department head nga  paspas na kaayo ang pag-proseso sa gatusan ka papeles  ug dili sama kaniadto nga molungtad og pipila ka adlaw ang pagpinaabot niini.

“Asking for 100 copies it will take us pila ka adlaw, kuhaon sa libro , ato pang i-recopy magtatak pa. Whereas, karon pag-ingon nimo nga unsa imong name mas dali. Igo nalang tatak, pirma ang record officer”, butyag ni Calamba.

Base sa taho sa Cebu City Public Information Office nga gustong mapatuman sa CAO ang han-ay ug hapsay nga sestema ug usa usab sa plano niini mao nga mahimong

Mo log-in online ang mga tawo nga nagtinguhang mopalit og yuta inabagan sa nasudnong mga buhatan sama sa Bureau of Internal Revenue ug Registry of Deeds.

Tumong niini nga sayon na unya ang pagsuta sa nanag-iya ingon man usab ang  balayranan sa yuta ug uban pa.

Sa pagka karon, gihimo ang pagbahig-bahig sa tanang mga record aron dali na unya ang pagtultol sa nahimutangan niini.

Gihimo usab sa maong buhatan ang aerial mapping alang sa dinalian nga pagsubay sa luna.

Sa laing bahin, gibutyag ni  Calamba nga nagpadayon usab ang ilang pag-ila sa tagsa-tagsa ka kantidad sa tanang real property  nga gipanag-iya sa kagamhanan sa siyudad.

Wala pa malakip niini ang ubang sestema nga target nilang ipatuman alang sa revalidation sa tanang yuta nga gikan sa agricultural, residential ngadto na sa commercial. —BDB (BANAT NEWS)