Karambola sud sa CSCR Tunnel

CEBU, Philippines — Tulo ang naangol lakip na ang usa nga nadala sa tambalanan human nakaangko’g mga samad tungod sa pagbangga sa lima ka mga sakyanan sa South Road Properties, Northbound lane, mga alas 4 sa hapon, kagahapon (Biyernes). Ang nalambigit sa panagbangga  mao ang duha ka ten-wheeler truck ug nangapagan sab ang duha ka SUVs, pickup ug multicab.

Matud ni Police Staff Sergeant, Arnilo Limalima, ang traffic investigator, ang mga nasamdan mao sila Jayson Alimalima, drayber sa ten-wheeler truck ug pahinante niini nga si Cyril Alonzo. Dali silang gidala sa duol nga tambalanan.

Si Limalima miingon nga ang ikatulo nga naangol mao si Clark Borbon, ang drayber sa usa ka gray nga SUV, wala hinuon siya madala sa tambalanan tungod kay gamay ra ang samad nga naangkon niini.

Sa inisyal na pakigsusi, si Alimalima, ang ten wheeler truck driver, giingong nawad-an og brake  ug nabanggaan ang laing ten wheeler truck sa iyang atubangan.

Ang mga biktima sa insidente mitug-an sa mga sakop sa media nga kusog ang  dagan sa trak nga unang nakabangga ug nadarok ang trak sa atubangan niini ngadto sa gisundan sab niining uban pang sakyanan.

Miresponde dayon ang Cebu City Disaster Risk Reduction and Management Office, Bureau of Fire Protection (BFP-7) sa lugar. Si Limalima miingon nga maghimo pa sila og imbestigasyon bahin sa hitabo. —/IBM (BANAT NEWS)