DVMF hugot nga nagbantay sa mga produktong baboy

CEBU, Philippines — Samtang nagpadayon ang hulga sa African Swine Fever (ASF), ang Department of Veterinary Medicine and Fisheries (DVMF) sa dakbayan sa Sugbo nagpabiling hugot nga nagbantay aron malikayan ang pagsulod sa mga produkto sa baboy gikan sa ubang mga lugar, ilabi na gikan sa Mindanao.

Si Dr. Jessica Maribojoc, hepe sa DVMF, una nang niingon nga wala nila hunonga ang pagmonitor sa pagsulod sa gidili nga mga pork ug poultry products sa mga pantalan sa dakbayan ug padayon usab sila nga nag inspeksyon sa mga tindahan.

Sa taho sa Public Information Office, si Maribojoc niingon nga ang dakbayan magpadayon sa maong lakang ilabi na nga aduna nay bag-ong positibong kaso sa ASF sa Zamboanga City.

Dili gihapon makasulod sa Dakbayan ang mga karne nga gikan sa Luzon, ug Region 8.

Gibutang sa Bureau of Animal Industry (BAI) ang Zamboanga City ubos sa “red zone” tungod kay na-detect ang mga kaso sa ASF sa lima ka barangay. Matud ni city veterinarian Dr Mario Arriola, ang mga apektadong barangay mao ang Pasonanca, Bunguiao, Mangusu, Curuan ug Manicahan,ug tulo ka mga lugar ang napugngan pinaagi sa depopulasyon ug gihatag ang tabang sa mga apektadong swine raisers.

Usa ka semana ang milabay, si Mayor Michael Rama nideklarar nga ang dakbayan sa Sugbo mosunod sa pamaagi sa probinsya sa pagdili sa mga pork ug poultry products gikan sa mga dapit nga apektado sa ASF ug sa Avian Influenza (bird flu).

Wala na moluwat og kaugalingong direktiba o executive order si Rama sanglit i-adapt na lang sa dakbayan ang direktiba nga giluwatan ni Gobernador Gwendolyn Garcia.

Sa laing bahin, gigukod usab sa mga enforcement team sa DVMF ang mga tawo nga nigamit sa dili rehistrado nga mga ihawan.

Ang DVMF nagpahigayon usab og pagbakuna ug naghatag og bitamina sa mga baboy, baka, kanding, ug uban pa.— MEL (BANATNEWS)