CAD nipasigarbo sa “Tamboanan” sa Barangay Taptap

CEBU, Philippines — Usa sa gipasigarbo karon sa Cebu City Agriculture Department ang bukirang bahin sa Dakbayan mao ang gitawag nila og “Tamboanan” diha sa Barangay Taptap.

Nasayran nga usa kini sa gibisita sa mga tawo nga   gustong magpahayahay o maglulinghayaw diha sa bukid.

Nahimutang ang Tamboanan unahan sa field office sa CAD sa dili pa kaabot sa Cebu City Resource Management and Development Center.

Base sa taho sa Cebu City Public Information Office, gibutyag ni Joey Baclayon, head sa CAD nga unang nailhan ang Tamboanan niadtong tuig 2013 kinsa niadtong higayona si Mayor Michael Rama mao usab ang mayor sa siyudad.

Aduna kini showcase model areas sa CAD nga nagpakita sa teknolohiya sa panguma ug maoy moabag usab sa mga mag-uuma nga gustong magkata-on niini.

Gitinguha ni Baclayon nga palambuon ang estruktura sa Tamboanan aron makonsiderar usab kini nga usa sa mga bisitahon sa mga turista.

Ang mga mag-uuma kinsa gikan sa nagkadaiyang organisasyon maoy iyang padumalaon niini aron makapamaligya usab sila sa ilang mga produkto sama sa utanon, lagutmon, ug mga pagkaon ngadto sa mga mobisita diha sa Tamboanan.

Nasayran usab nga adunay ubang parte niini ang nangaguba sa bagyong Odette ug mao kini ang ipaubos sa renovation.

Diha sa Tamboanan makita ang lapad  nga  senaryo sa Siyudad sa Sugbo.

Sayo pa, gipasigarbo ni Konsehal Jocelyn Pesquera sa Cebu City Tourism Commission ang nindot nga mga talan-awon diha sa kabukiran.

Matud ni Pesquera nga ang maong sitwasyon nakatampo usab alang sa anam-anam nga pagbangon sa turismo sa siyudad nga naapektohan dihang nikuyanap ang pandemiya. BDB (BANATNEWS)