IEC buksan na pagbalik sa publiko karong hunyo

CEBU, Philippines — International Eucharistic Congress nga nahimutang sa Pope John Paul Avenue, subli na usab kining buksan sa publiko karong Hunyo 5, 2022 atol sa Pentecost Sunday.

Kini ang gitug-an ni Fe Mantuhac-Barino, Chairman sa Commission on the Laity sa Archdiocese of Cebu.

Sa nasayran ang IEC gipagamit sa Archdiocese ngadto sa kagamhanan sa siyudad sa Sugbo sukad niadtong March 2020 hangtud May 2022 isip temporary treatment monitoring and isolation facility (TTMF) alang sa mild ug moderate COVID-19 patients.

Sumala pa ni Barino, ang pagpagamit sa maong facility maoy tabang sa simbahan sa pakigkombati sa kagamhanan batok sa COVID-19.

Sa pagkakaron padayon pa ang paglimpyo sa maong lugar ug pagpabalik niini sa naandan  aron mahimo na kining magamit sa nagkadaiyang kalihukan.

Dugang pa ni Barino, ang maong facility gigamit ug Isolation ug Vaccination Center sa Project Balik Buhay sa Bayanihan Cebu ug karong tuiga gigamit og extension hospital beds sa VSMMC.

Sa laing bahin gidasig sa City Health Office (CHO) sa siyudad sa Mandaue ang mga molopyo sa pagpa-booster shots kontra coronavirus disease isip panagang sa hulga sa Omicron Subvariants.

Si Dr. Dominga Obenza, city health officer sa maong siyudad miingon dili gayod angay magsalig lang ang mga tawo nga fully vaccinated.

Dugang pa ni Obenza nga makatabang ang pagpa- booster alang niadtong mga tawo nga eligible sa pagkuha og second doses nga booster shots.

Si Obenza miingon nga nagtinguha sila karon sa pagpahigayon og vaccination sa kabarangayan aron pagpaduol sa mga molopyo nga nagtinguha sa pagpabakuna. — /MEL (BANAT NEWS)