Mga establisamento kinahanglang preparado sa katalagman

CEBU, Philippines — Walay pagsupak ang Committee on Laws, Ordinances, and Styling sa Konseho sa Siyudad sa Sugbo sa giduso nga ordinansahon nga nagmando sa tanang mga patigayon nga nag-operate dinhi sa siyudad nga kinahanglan nga duna kini  standby power supply isip preparasyon kun dunay emerhensya.

Ang maong tinguha nagmando nga kinahanglan nga mag-andam og 50% nga gasolina, pagkaon, medisina, ug cash supply nga kabahin sa  Resiliency and Efficiency Amidst Disaster and Emergency (READE) Compliance Certificate. Si Konsehal James Cuenco ang nag-umol niini  ug alang kini sa nagkadaiyang establisamento nga sama sa  fuel stations, drinking water refilling stations, supermarkets o groceries, botika, telecommunication towers , ug  commercial banks. Sa committee level, nirekomendar kini sa pag-umol og public hearing. Tumong sa kagamhanan nga malikayan ang nahiagoman sa siyudad sa miaging tuig kun diin pagkahuman sa Bagyong Odette, nagnihit ang basic needs sama sa ilimnong tubig, pagkaon, gasolina, ug uban pa. Matud pa nga maayo kaayo ang maong ordinansahon sanglit naghatag kini og lapad nga preparasyon sa bisan unsa nga kalamidad.

Ang lakang naglaum nga maminusan ang ekonomikanhon ug sosyal nga epekto nga dala sa usa ka sitwasyon diin ang mga batakang panginahanglan nihit sa panahon nga ang mga tawo nanginahanglan niini.

Subay sa mandato sa Konstitusyon, ang estado manalipod ug mosulong sa katungod sa katawhan ngadto sa balanse ug makapahimsog nga ekolohiya subay sa ritmo ug panag-uyon sa kinaiyahan. Dinhi namugna ang R.A. 10121 o ang Philippine Risk Reduction and Management niadtong 2010. “Needless to state, this ordinance which aims for the city’s resiliency and efficiency during a disaster is legally sanctioned by no less than our Constitution and its national laws,” dugang unod sa  committee report. —/IBM (BANAT NEWS)