Cash assistance ipanghatag na sa siyudad

CEBU, Philippines — Andam na ang Kagamhanan sa siyudad sa Sugbo sa pagpadayon sa pag apod apod sa   nagkadaiyang financial assistance programs sugod ugma, Mayo 13.

Gihulagway kini ni Mayor Michael Rama nga "massive distribution" diin giawhag usab niya ang ubang opisyales sa siyudad nga motabang.

"Bisan ako, andam ko motabang sa distribusyon kun gikinahanglan," matud pa ni Rama.

Ang Cebu City Treasurer's Office (CCTO) nipreparar na sa  P277 million nga assistance alang sa 49,802  nga naapektohan sa bagyong Odette , biktima sa sunog, scholars ug uban pa.

Pipila sa mga naungot nga assistance tungod kay naabtan sa election ban mao ang Tabang Alang sa Panginabuhian sa Atong Trabahante (TAPAT) o  economic stimulus package,octogenarians nga senior citizens , mga programa  sa rehabilitasyon sa  City Office for Substance Abuse Prevention (COSAP) ,  Women and Family Affairs Commission (WFAC) ug Self-Employment Assistance Program  (SEAP).

Nalakip usab niini ang mga subsidy sa Gender and Development (GAD) ug sa allowances sa mga na-hire sa Special Program for Employment of Students (SPES).

Nagkanayon si Rama nga dili siya gusto nga malangan ang pag-apod apod niini. —MEL (BANATNEWS)