Way lockdown human sa eleksyon

CEBU, Philippines — “No lockdown after elections.” Kini maoy gihimug-atan ni Cebu City Councilor Joel Garganera, pangulo sa Emergency Operations Center Cebu City atol sa gipatawag niini nga press conference kagahapon sa buntag.

Giklaro kini ni Garganera human nga sa mga nanglabay nga semana daghang mga nadungog nga hungihong nga  mag-lockdown ang siyudad human sa piniliay karong Mayo 9.

Si Garganera miingon nga dako kining binuang ug nasagmuyo siya sa mga tawong nagpakatap niini. Matud sa konsehal susama og gipakawalay-kapuslanan sa mga nagpakatap aning maong estoryaha ang mga paningkamot sa siyudad aron mapugngan ang pagkatap sa Covid-19.

Gipaningkamotan sab sa siyudad nga makuha ang target population nga mabakunahan sa COVID-19 vaccines mao nga ang Cebu City maoy nauna sa gipaubos sa alert level 1 sa tibuok rehiyon.

“Dako ng binuang nga ma-lockdown and i have to say this once no lockdown after election, no lockdown, if we might be experiencing spike dugay na unta gani daghan ta nga gipahigayon nga mga political gatherings by the hundreds of thousands grabe pero did we ever experience a spike or any slightest sign nga nisaka atong kaso, wala, in fact karong adlawa zero ang atong kaso that bring the cases down to only 27 active cases in 62 barangays in the city so gwapo kaayo ang atong kahimtang karon,” sigon ni Garganera.

Kun si Garganera maoy pasultihon,  dili siya buot pa nga mobalik ang siyudad sa kaniadto kay layo na ang nakab-ot sa Cebu City bunga sa paningkamot sa tanan.

Nagkanayon sab ang konsehal nga kun pananglitan dakbayan sa Sugbo makasinati og pagsaka sa kaso sa COVID duna ray igong pasilidad ang siyudad aron moatiman sa mga pasyente.

Ang isolation facility sa Cebu City mao ang Moses Quarantine Facility diha sa north reclamation area,  naa sab diha sa Cebu City Medical Center diin anha atimanon ang mga mabdos nga maigo sa Covid ug noah pwede ra himoon nga isolation facility kun kinahanglanon tungod kay diha man gibutang nga mga gamit nga gikan sa barangay isolation centers.

Tungod niini, ang kapulisan sa Dakbayan sa Sugbo nitug-an nga walay kamatuoran ang taho nga adunay lockdown human sa election ug mipahibalo si Police Lieutenant Colonel Wilbert Parilla, Deputy Director for Operation nga naghimo sila karon og imbestigasyon kun kinsa ang nagpakatap niini.

Kung mapatud-an nila ug adunay ebidensya sa mga nagpaluyo niini, mag-atubang kini ug tukma nga kaso. — Rowena Capistrano (BANAT NEWS)