Durano: Adventure sites daku og potensyal alang sa turismo sa Sugbo

CEBU, Philippines — Karon nga hinay-hinay nang mibalik ang turismo sa Sugbo, si gubernatorial candidate Ace Durano misuway og rock climbing sa barangay Cantabaco sa dakbayan sa Toledo.

Nasayran si Durano mahiligon sa adventure tourism activities ug suma pa niya nga daghan pang tourism sites gawas sa mga sikat nga beaches ang angayan nga palambuon.

“Daghang mga lugar nga adventure tourism sites nga sama niini ang puwede pa ma-diskobre ug ma-develop. Dako kaayo kinig potential sa turismo sa Sugbo kay daghang lokal ug langyaw’ng turista ang ganahan niini,” matud pa ni Durano.

Si Durano nahimong pangulo sa Departamento sa Turismo sulod sa unom ka tuig sugod tuig 2004 hangtud 2010 diin nakamugna ang turismo sa nasud og sobra P500 bilyones nga investments ug tres milyones nga trabaho.

Makapasalig ang kanhi tourism secretary nga ubos sa iyang pagdumala sa probinsya, ma-palambo pa niya ang turismo sa Sugbo.

“Ang tourism industry sa Pilipinas nahimong usa sa mga major drivers sa ekonomiya atol sa atong pagdumala sa departamento, ug nakita nato ang benepisyo nga ma-ani sa katawhan bisan wala na ta kon malungtaron ang programa, dili pangkwarta,”  segun pa ni Durano.

Gawas sa turismo, nag-una usab sa prayoridad ni Durano ang paghimong libre sa serbisyo sa mga provincial ug district hospitals apil niini ang tambal.

Gusto usab ni Durano nga paubsan ang buhis sa yuta sa probinsya kay matod pa niya sobra ra kaayo ang pagsaka niini ilabina nga dili pa hingpit ang pagbangon sa ekonomiya sa Sugbo.MEL (BANATNEWS)