Belgica: Dili motuo dayon sa mga survey

CEBU, Philippines — Giawhag sa kanhi chairman sa Presidential Anti-Corruption Commission (PACC) ug Senatorial Candidate Greco Belgica ang mga botante nga dili motuo dayon sa mga nanggawas nga survey.

Si Belgica kinsa magpapili pagka-senador sa umaabot nga Mayo 9, 2022 national ug local elections nihulagway nga adunay ubang mga survey nga gimugna lang aron pagpakondisyon sa huna-huna sa katawhan.

Nasayran nga si Belgica anaa kini sa Sugbo sukad niadtong niaging semana diin nakigtagbo kini sa mga nagkalain-laing lider.

“Yung mga lumalabas kasi na survey ngayon parang nakakondisyon ng isip pero these are surveys that came from 2,500 people, 1,500 people this is not the majority of our people, this is not sovereign people”, matud ni Belgica.

Si Belgica nagkanayon nga ang surveys nga gihimo usa ka publicity stunt sa mga kandidato ug usa ka negosyo. Sa mga nanggawas nga survey sa mga senador nga kusog sa umaabot nga piniliay wala malakip ang ngalan ni Belgica apan alang niya dili kini tinuod gumikan kay base sa ilahang internal survey ug lokal nga mga survey ang iyang ngalan nalakip sa top 12.

Hangyo karon ni Belgica sa katawhan ilabi na sa mga Sugbuanon nga dili dayon motuo sa survey ug kon mobotar man og kandidato basehan niini  ang mga nahimo alang sa kaayohan sa nasud.

“Ang daming kandidato na hindi sikat na maraming nagawa at maraming sikat na corrupt. Wag magpadala diyan. Choose and vote wisely”, dugang ni Belgica. BDB (BANATNEWS)