Pagpamakuna sa kabataan magpadayon
CEBU, Philippines — Magpadayon ang pagpamakuna sa mga kabataang edad 12 ngadto 17 anyos sa Cebu City samtang gihunong pa ang pagpamakuna sa mga batang edad 5 ngadto sa 11 anyos sumala pang Dr. Jeffrey Ibones, Officer-in-Charge sa Cebu City Health Department.
Karon nga nahurot na ang reformulated Pfizer BioNtec vaccine para sa mga 5-11 anyos, gamiton lang una ang ilang vaccination sites sa mga 12-17 anyos tungod kay daghan pa sa maong mga edad ang wala pa mabakunahi.
Ang mga vaccination sites nga 5 anyos ngadto sa 11 anyos mao ang gym diha sa Cebu City Sports Center ug Ayala Center Cebu.
Madugang kini sa vaccination sites sa SM Seaside City Cebu, SM City Cebu ug ang UC Banilad nga modawat og vaccination alang sa 12 anyos ngadto sa 17 anyos. Ang Robinson’s Cybergate giplanohan sab nga pahigayonan og vaccination sa 5 -11 anyos kun moabot na ang supply niini.
Moabot na sa 4,500 ka mga batang 5- 11 anyos ug 60 mil nga 12 -17 anyos ang nabakunahan sa kontra COVID-19.
Giangkon sab ni Ibones nga daghan pa gihaponga mga hamtong nga nakadawat na og duha ka doses sa bakuna ang wala pa nagpa-booster shot maong nanawagan kini sa barangay officials sa pagtabang pagawhag sa katawhan bahin niini.
Sa pikas bahin, si Cebu Archbishop Jose Palma nagpasalamat sa mga tawong bisan dunay pandemiya ug bag-ohay pang naigo sa bagyong Odette wala magpanuko pagtabang sa mga nagkinahanglan. —Rowena Capistrano/IBM (BANATNEWS)
- Latest
