45 namatay sud lang sa walo ka adlaw

CEBU, Philippines — Gibutyag sa pangulo sa Emergency Operations Center Cebu City Cebu City Councilor Joel Garganera nga sa milabay nga walo ka adlaw sa buwan sa Enero miabot na og 45 ang nakalas tungod sa coronavirus disease(COVID)-2019.

Sigon sab sa Konsehal nga sa 45 nga namatay, ang 19 niini wala magpabakuna unvaccinated, 11 ang partially vaccinated ug 5 ang fully vaccinated.

Ang konsehal nabalaka nga misaka ang COVID deaths sa Cebu City ilabi na nga kadaghanan sa mga nakalas sa maong virus dili bakunado.

“Og mangutana mo sa vaccination 80 percent of them the very least are unvaccinated unya most are elderly so kinahanglan we have to revisit kaning atong home isolation specially nga ang majority or 66 percent sa mga nangaigo gyud is from 20 to 40 years. So, mao na siya mga working nga sector sulod gawas and then they should be mindful og naa sila’y mga miyembro diha sa ilahang household nga mga elderly nga unvaccinated, naay gipangmulo ug labaw na naa pud mga pedia(bata),” sigon ni Garganera.

Gihimug-atan ni Garganera nga gikinahanglan gyud nga mabakunahan kontra COVID tungod kay nagpabilin pa gyud ang hulga sa virus ug mas maayong dunay panagang batok niini ug dili mokompiyansa.

Gipahibawo sab sa Konsehal nga sa pagkakaron naa ang Cebu City duna lay 602 COVID beds itandi sa miaging tuig dihang nisaka ang kaso tungod sa Delta variant nga dunay 1,012 COVID beds nga giandam.

Si Garganera miingon nga ang rason nganong gamay ra ang COVID beds tungod kay dul-an sa 700 matid pa ka mga frontliners sa mga tambalanan naigo sa COVID-19. “It’s growing, 692 atong mga fronliners sa 22 ka mga hospital and medical facilities nato na isolate. So you have to be mindful diha kung maglabi ta og taas unya mao rani atong ma accommodate although so far ang atong ER are okay, maayo atong discharge, maayo atong pagdawat so dali ra kaayo so kana lang tingali, let us all be mindful pa gyud kay lisod kaayo wala ta kahibawo what’s install for us in the coming days,” pasabot sa konsehal.

Mga polis natakdan

Sa laing bahin, 17 ka mga personnel sa Cebu City Police Office ang positibo karon sa coronavirus disease 2019 (COVID-19) sumala pa ni Lt. Col. Wilbert Parilla, deputy city director for operations sa CCPO.

Mao kini ang nakita sa gihimong massive swab testing sa miaging semana sa tanang buhatan sa CCPO. Kagahapong adlawa, duna say laing mga polis ang gipaubos sab sa swab test ug duna say laing swab  testing nga himuon karon.

Sigon ni Parilla nga ubay-ubay ang mga nagpositibo ang adunay mild symptoms ug aduna usab mga asymptomatic ra.

“Usa sa kamandoan nga atong gihatag sa mga personnel kadtong gusto mag isolate, undergo gyud sila testing. Isolate then four days mao na incubation, fourth day swab test sila,” dugang ni Parilla.

Dugang ni Parilla nga fully vaccinated na ang halos tanan nga mga personnel sa CCPO ug gani daghan na usab nila ang nakadawat na sa ilahang booster shots.

Bisan pa niini, magpadayon gihapon ang functions ug mga operasyon sa CCPO tungod kay duna pa gihapon kini paigong pwersa.

Nikubos sa Talisay

Sa kalabot nga balita, nagkakubos na ang kaso sa Covid-19 sa Dakbayan sa Talisay.Gikan sa 500 ka mga aktibong kaso naa nalang kini karon sa 381.

Gihulagway ni Alvin Santillana, pangu sa City Disaster Risk Reduction and Management Office (CDRRMO) paspas gyud ang pagtinakdanay apan mild symptoms lang ang gibati sa mga nagpositibo.

Asoy pa niya nga ang bakuna maoy dako nga nakatabang sa mga tawo nga nataptan sa virus. Gani sa mga nagpositibo wala kanila ang nagkinahanglan og oxygen.

Ang ilang Temporary Treatment and Monitoring Facility diha sa barangay Lagtang nagamit na sa 14 ka pasyente.

Samtang ang mga PUI ug PUM gipahiluna sa pipila ka mga lawak saringan sa Talisay City Central School. – Iris Hazel Mascardo ug Gabriel Bonjoc/IBM (BANAT NEWS)