Pagpasabot kabahin sa Mandanas ruling gihangyo ni Dizon

CEBU, Philippines — Gihangyo ni Konsehal Alvin Dizon ang Sangguniang Panlungsod nga sugdan na ang learning sessions sa ilang mga sakop bahin sa hukom sa Mandanas ruling ug uban pang nalambigit nga mga isyu alang sa pagpatuman niini.

Kini aron ang konseho makabaton og hingpit nga pagsabot nga mogiya kanila sa pag-umol sa mga polisiya ug mga lakang aron makatabang sa hingpit nga debolusyon, pagsulbad sa mga hagit sa transisyon, paghimo og mga mekanismo alang sa partisipasyon sa katawhan.

Ang "Mandanas Ruling" mao ang paglakip sa tanang koleksyon sa nasudnong buhis sa pagkuwenta sa basehan sa makiangayon nga bahin sa mga Local Government Units LGU.

Gawas kini niadtong natigom sa mga pundo sa espesyal nga katuyoan ug mga espesyal nga alokasyon alang sa paggamit ug pagpalambo sa nasudnong kagamhanan. Si Dizon maoy nangamahan sa maong resolusyon nga giaprobahan dayon sa konseho. Gihangyo usab sa konsehal ang Sanggunian nga mopasar og ordinansa nga mag-institutionalize sa partisipasyon sa katawhan alang sa mga proseso sa pagbadyet ug pagplano sa pipila ka mga programa ug proyekto.

Gidugang ni Dizon ang Executive Order No. 138 series of 2021 nga gipirmahan ni President Rodrigo Duterte nagmando usab alang sa paghatag og unang pagtagad sa mga basic services ug facilities gikan sa national government ngadto na sa LGUs subay usab sa implementasyon sa Mandanas ruling.

Subay niini gipaabot nga ang kinatibuk-ang bahin sa LGUs gikan sa nasudnong buhis gipaabot nga mosaka sugod sa tuig 2022. —MEL (BANATNEWS)