Quarry operation gisuspenso sa Dakbayan sa Talisay

CEBU, Philippines — Gisuspenso ang quarry operation sa Dakbayan sa Talisay sugod niadtong Martes.

Kini human si gobernador Gwendolyn Garcia niaprubar sa hangyo ni mayor Gerald Anthony “Samsam” Gullas.

Si Gullas nihangyo sa pagsuspenso sa quarry operation human sa panghitabo nga disgrasya sa Lawaan 3 nga nikalas og lima ka kinabuhi ug nagbilin og samdan nga indibidwal.

Ang operasyon sa quarry buksan pagbalik human sa himuon nga traffic plan.

Ang Syudad sa Talisay maghimo og komitiba nga makigtagbo sa stakeholders aron hisgutan ang traffic plan labot sa pagkuha og minerales ug paghatag og permiso sa waste disposal nga luwatan sa Provincial Environment and Natural Resources (PENRO).

Si Gullas nipadangat sa iyang pahasubo sa tanang pamilya nga namatyan ingon man nasamdan nga padayon nga giatiman sa tambalanan.

Apan nasagmuyo lang sa ubang tawo nga gi politika ang nahitabo nga disgrasya ug gigamit ang kamatayon sa mga nabiktima alang sa ilahang politikanhong interes.

Gidugang ni Gullas nga adunay uban nga gibasol ang mga sakop sa City of Talisay-Traffic Operation Development Authority (CT-TODA) nga walay nahimo sa pagpugong sa hitabo.

Iyang gipasabot nga ang CT-TODA mao lang ang mo implementar sa ordinansa nga gihimo sa konseho.

Mipatuman sila og truck ban nga ordinance nga magsugod sa alas sayes ngadto sa alas otso sa buntag ug alas kwatro ngadto sa alas otso sa gabii.

Gani daghan sila og nadakpan labot sa balaod “But the reality is, our traffic laws can only be followed as long as there is an enforcer present manning our streets. Kung sa Binisaya pa, ang enforcer ra gyud ang bantayan,” nagkanayon si Gullas.

Samtang sila mopadayon sa paghisgot kung unsa ilang mahimo bahin sa operasyon sa quarry. MEL (BANATNEWS)