10 outstanding brgys nakadawat og incentive
CEBU, Philippines — Mokabat sa napulo ka barangay sa siyudad sa Sugbo ang gipasidunggan sa Cebu City Office for Substance Abuse Prevention (COSAP) human sila napili nga outstanding Barangay Anti-Drug Abuse Council (BADAC) karong tuiga.
Ang napulo ka barangay gilangkuban sa Sudlon I, Sto. Niño, Sinsin, Sapangdaku, Sudlon II, Parian, Toong, Basak Pardo, Mabini ug Luz.
Matod sa pangulo sa COSAP Jonah John Rodriguez niadtong Nobiyembre 28, 2021 gipahigayon ang awarding sa top 10 barangays diin matag usa kanila nakadawat og P100, 000 isip cash incentive.
Giklaro ni Rodriguez ang pagpili og best performing BADAC dili kay gitudlo-tudlo lang kundili gihashasan kini nila uban sa Department of Interior and Local Government(DILG) ug Philippine Drug Enforcement Agency(PDEA)-7.
“Duna tay mga parameters og giunsa nato pagpili and then ang usa sa pinakadako nga points is kung na declared ka as drug cleared so that’s why kasagaran diri ang naa sa drug cleared, na drug cleared nga mga Barangays, aside from that ang ilaha sad gyud kalihukan didto sa barangays mao nay usa sa mga points nga atong gibasehan para mapili as best performing BADACs”, pasabot ni Rodriguez.
Sa pagkakaron dinhi sa Cebu City pito ka barangay ang nadeklarar nga drug cleared sama sa Sudlon I, Sto. Niño, Sinsin, Sapangdaku, Sudlon II, Parian ug Toong.
Sa laing bahin, padayon nga pakigbatokan ang ilegal nga drugas sa Dakbayan sa Talisay nga maoy prayoridad sa bag-ong hepe sa kapolisan. Si Police Lt. Col. Randy Caballes niawhag sa kabataan nga motabang sa pagsumpo niining matang sa ilegal nga kalihukan.
Una niini, ang Philippine Drug Enforcement Agency (PDEA) nakigtagbo sa bag-ong hepe aron hisgutan ang stratehiya sa pagsumpo sa ilegal nga drugas. —Gabriel C. Bonjoc/MEL (BANATNEWS)
- Latest
