120 ka drug surrenderees migradwar sa rehab program

CEBU, Philippines — Miabot sa 120 ka mga drug surrenderees ang mi-graduate sa gihimo nga drug rehabilitation sa lungsod sa Minglanilla ug Dakbayan sa Talisay.

Sa Minglanilla adunay 32 ka indibidwal nga tiggamitan sa ilegal nga drugas samtang 88 gikan sa Talisay nga nagbag-o na.

Gipaubos sila sa barangay o community out-patient rehabilitation nga programa sa tagsa ka lokal nga kagamhanan.

Sa Talisay, mao kini ang nalakip sa ilang programa sa pakigbatok sa ilegal nga kalihukan.

Si Police Lt. Col. Randy Caballes nituo nga dili lang pagdakop sa ilegalista ang ilang himuon kundi sa pagtudlo sa mga adik kung unsaon paglikay sa maong matang sa bisyo.

Gawas pa niana, dako sab og papel ang pamilya sa nagbisyo hinungdan nga ila sab gyud kining pasabton sa sitwasyon.

Tinguha nila nga mas modaghan pa ang mga barangay nga madeklara nga drug cleared.

Samtang sa laing bahin nagtingkagol na sa karsel ang 20anyos nga lalaki human kini nasikop sa buy-bust operation nga gipahigayon sa City Intelligence Unit sa Cebu City Police Office sa may Sitio San Lorenzo Ruiz, Barangay Tisa ning Dakbayan sa Sugbo, Miyerkules sa gabii.

Ang nasikop naila nga si Jansen Daclan, residente sa maong lugar.

Nasakmit gikan kang Daclan, ang 9 ka medium size sa gituohang shabu nga mobalor ug 312,800 ka pesos base sa Dangerous Drug Board Value ug Buy-bust money.

Ang kapulisan nag-andam na karon sa pagpasang-at ug tukma nga kaso batok sa dinakpan.— Rowena D. Capistrano/MEL (BANATNEWS)