Nalumos sa lunangan sa kabaw

CEBU, Philippines — Patay ang usa ka lalaki nga gituohang nalumos sa lapok nga lunangan sa kabaw  diha sa Purok Mangga, Barangay Mangoto, Lungsod sa Pinamungahan niadtong Miyerkules sa buntag.

Ang nakalas mao si Lemuel Flores, 67, residente sa maong lugar.

Matud pa ni Police Corporal Christian Ortega, imbestigador sa Pinamungahan Police Station kataposang nakita si Flores niadtong Lunes sa udto ug giingong nagsusapinday kini og lakaw ug gidudahang hubog.

Si Ortega miingon base sa ilang mga nahipos nga kasayoran gikan mismo sa pamilya niini pirme gyung hubog si Flores. Nahibulong lang sila adtong Lunes kay wala kini makauli maong ilaha kining gipangita.

Adlaw na nga Miyerkules kini nakit-an nga naglutaw na sa lunangan sa kabaw ug wala nay kinabuhi.

Gituohan sa kapulisan nga niadto pang adlaw nga Lunes sa hapon nalumos si Flores apan walay nakabantay sa nahitabo kaniya tungod kay awaaw ang lugar ug lagyo ang mga kabalayan.

Ang pamilya ni Flores nagdumili na sa pagpa-otopsiya kaniya tungod nagtuo silang wala nipasipala niini nga nakaingon sa iyang kamatayon. —IBM (BANATNEWS)